O le 3 miliona tala na pasia i le tala autū o le tupe a le Malo mo le tausaga faaletupe o loo faagasolo ua fuafua mo le faamanuiaga mo tagata e iai manaoga tumau o le tino, o lea ua lipotia le maua o lea faamanuiaga tau seleni e selau tala i le masina.

O se tasi lea o fuafuaga a le faigamalo a le faatuatua i le atua Samoa ua tasi, ua agavaa nei iai le 902 o tagata e iai manaoga tumau i totonu o le atunuu. O le tuanai o le aso malolo o le Aso Sa o tina i le masina nei na amata maua ai lea faamanuiaga ua tuusa’o i teugatupe i faletupe a alii ma tamaitai e iai manaoga tumau o le tino ma le mafaufau.

Ua faailoa e le Minisita o Tupe i se faatalanoaga i le televise o le EFKSTV2, o le uluai totogiina o le faamanuiaga lenei o loo amata mai ia Novema o le tausaga na te’a nei. O le taimi muamua lenei i se fuafuaga a se faigamalo ua maua ai se faamanuiaga tau tupe mo ē e iai o latou manaoga tumau.  Ua faaopoopo atu lea i le isi fuafuaga a le Malo o le faamanuiaga tau tupe o le penisione mo tagata matutua ua aulia le 65 tausaga o le soifua.

O le matagaluega o tina ma tamaitai atina’e o nuu ma afioaga ma aga fesootai o loo feagai ma le faamanuiaga tau seleni mo i latou e iai manaoga tumau.