Ua talosaga nei mo se fesoasoani se tasi o Food Bank poo se nofoaga e teuina ai taumafa i Aukilani, ina ua osofai e le augaoi le nofoaga ma ave meataumafa ina ua o latou faaaogā se pu i le wall o le fale e ulufale ai.
Fai mai ua 20 tausaga o faia pea le auaunaga a le Food Bank lea i Glen Innes ae na faailoa e le alii pule o Ian Furlong i le Morning Report e lē o le uluai taimi lea ua taulai atu ai ituaiga osofaiga faapea ia i latou.
Fai mai Furlong o le faamoemoe o nei ituaiga auaunaga ina ia fesoasoani i le komiuniti o loo feagai ma tulaga faigata o le soifuaga ma itiiti se tupe maua ma o le auaunaga foi e faamoemoe i foai mai tagata e alolofa ma faalapotopotoga.
Pe lata i le 30 i le vaiaso parcels o taumafa e tuuina ane mai lea nofoaga mo ē manaomia le fesoasoani ma ua faate’ia i latou i le tulaga ua tulai mai.
Fai mai le alii pule o le tele o taumafa ua gaoia o meaai tuuaisa e pei o aano o manufasi, biscuits ma isi.
O le itu e faanoanoa atili ai le alii pule ona afai e manaomia ni taumafa e mafai ona tuu ane pe ana agai sa’o atu ma talosaga mo se fesoasoani peitai o lea ua faaleagaina ai ma le fale e lē taumate e tele isi tupe o le a manaomia ona faaalu ai.
O le talosaga la e mo tagata ia foai i le Givealittle ia maua ai se fesoasoani i le toe faaleleia o le fale ma le toe faatutumuina o fata o taumafa mo le faaauauina o le auaunaga.
Puna o Faamatalaga: https://www.1news.co.nz/2024/07/12/auckland-food-bank-emptied-by-thieves-ripping-hole-in-wall
