Ua faailoa se fuafuaga a le faigamalo a Albanese e aga’i i pisinisi ina ia mafai ona faaaogā pea tupe, cash e totogi ai faatau a tagata e amata atu i le 2026 i lalo o se fuafuaga a le malo e faamuta ai le faaaogāina o siaki.
Fai mai le Ālaata9 o le fuafuaga lea a le malo o loo taula’i i tagata Ausetalia e faamoemoe lava latou i tupe aemaise lava i le taimi o faalavelave tutupu faafuase’i, e totogi ai a latou faatau ae lē gata i lea o le taimi e faaletonu ai auaunaga faaonaponei poo digital.
Fai mai o le a faatalanoa e le ofisa o tupe le Treasury, le mataupu lea ma lona faatinoina aemaise o le faamautūina o oloa e faaigoa o essential items poo oloa e tatau lava ona mana’omia ona faaaogā e le tagata mo lona saogalemu.
E lē taumate e aofia ai oloa e pei o taumafa, penisini mo le taavale auā feoa’iga aemaise auaunaga tau le soifua mālōlōina.
O le faaitiitia pea o vaega e talia ai le totogi i tupe poo le cash sa aga’i iai se faatalanoaga talu ai nei ma ua i’u foi ina tapunia ai le tele o lālā o faletupe i le tausaga faaletupe na te’a nei ona ua tau leai nisi e aga’i iai ae faaaogā masini faaonaponei e totogi ai faatauga, o digital payments.
Puna o Faamatalaga: https://www.google.com/amp/s/amp.9news.com.au/article/4810f689-71f3-4523-bf0f-483194811dd6
