O feiloaiga a le matagaluega o faamasinoga ma le faafoeina o mataupu tau faamasinoga ma le mamalu o le atunuu e pei ona sa amata i Savaii ma faasolo mai ai i Upolu i le vaiaso nei, o se tasi o aiaiga tāua o loo toe faamalamalama ai, o le faiga lea o saofai.
Ua faailoa e le Ofisa Sili o le matagaluega, o le auai o sui o nuu poo pulenuu ua faamanino iai le tāua o le latou mulimulitaia o aiaiga o le tulafono, ina ne’i aafia ai i se moliaga i le faatumuina o pepa o se suafa matai e fia lesitala, ae o le tagata ua faaee iai se suafa matai e lei auai i le taimi o nofo.
E faasino tonu lava lea tulaga i le faiga o loo molimauina i nisi o faiga saofai, o le inu e le tagata i Samoa o le ‘ava mo se tasi ua ave iai se suafa matai, ae o lea tagata o loo nofo i fafo e lei auai i le faiga o matai poo saofai.
Le Ofisa Sili o le pulega o le matagaluega o faamasinoga ma le faafoeina o mataupu tau faamasinoga le susuga Papalii John Taimalelagi Afele.
