O le Aso Toonai nei i le taeao o le a toe fesilafa’i ai Samoa potopoto i Aukilani ma le susuga i le alii faipule ia Teanau Tuiono mo le faamaninoina o le lipoti a le soākomiti o le Palemene o Niu Sila.
Faafofoga mai i luga o le Radio Samoa i le afiafi nei Aso Tofi 5:10pm o le a faatalanoa ai e Leiataua Savea Al Harrington Lavea le alii faipule ia Teanau Tuiono ma faamautū atu ai le taimi ma le nofoaga o le feiloa’iga i le Aso Toonai nei.
O le ananafi aso 10 Oketopa na mae’a ai le galuega a le soākomiti (select committee) ma ua tuuina atu ai nei le latou lipoti i le Palemene.
O le aotelega o lenei lipoti o loo faapipii atu o loo ua autasi ai sui o le soākomiti ina ia toe faafoi le sitiseni NZ o tagata Samoa sa aveeseina e le tulafono Citzenship (Western Samoa) Act 1982 Bill.
E momoli le agaga faafetai i mafutaga faapea tagata ta’ito’atasi sa fai o latou sao i le taumafaiga o lenei sa’iliga malo mo Samoa.
E lē gata o tagata Samoa ae faapea foi isi e lē o ni Samoa o loo lagolagoina le pili taufaaofi a le faipule o Teanau Tuiono.
E ui o le mamafa o le galuega o loo feagai ma Samoa i Niu Sila nei, ae lē itiiti le sao o i latou i Samoa ma isi atunuu e auala i finagalo faaalia (submissions) sa tuuina atu i le soākomiti.
E tusa ma le 24,581 le aofai o mafutaga ma tagata ta’ito’atasi sa tuuina atu finagalo tusitusia i le soākomiti.
O le lipoti a le soākomiti o se fautuaga i le Palemene, ae lē o se faai’uga o le pili taufaaofi a le faipule ia Teanau Tuiono. O vaega nei o loo totoe o le mataupu:
1. Second Reading: O le a tālia ai nei le aso o le tolaulauga lona lua o le pili i totonu o le Palemene. Afai ae pasia e le Palemene, ona see atu lea o le pili taufaaofi i le Committee of Whole House. Ae afai ae lē pasia e le Palemene, o lona uiga o le muta’aga lea o le mataupu.
2. Committee of Whole House: A pasia le tolaulauga lona lua ona atofa lea o se aso e fai ai saunoaga ma felafolafoa’iga o finagalo a sui o le Palemene e uiga i teuteuga o le pili sa tuuina atu e le soākomiti. E iai le avanoa i le taimi lea mo nisi teuteuga e faia i le pili taufaaofi a o le’i tuuina atu mo le tolaulauga lona tolu.
3. Third Reading: A mae’a le faatalanoaina e le Palemene o le pili mo nisi teuteuga i le Committee of the Whole House, ona atofa lea o se aso e fai ai le tolaulauga lona tolu. Afai ae pasia le tolaulauga lona tolu, ona tālia loa lea o se taimi e tuuina atu ai le pule faamalumalu (Royal Assent) ina ia avea ai ma tulafolo. Ae afai ae lē pasia e le Palemene, o lona uiga o le muta’aga lea o le mataupu. Peitai e iai le maitau, e seāseā iai se pili e teena i le tolaulauga lona tolu.
4. Royal Assent: O le mae’a ona tuu iai o le pule faamalumalu ona avea loa lea ma tulafono a Niu Sila ma agavaa ai loa i latou o loo ta’ua i le tulafono toe teuteu e talosaga mo le sitiseni Niu Sila.
O le pasia o le tolaulauga muamua faapea le aga’i atu i le tolaulauga lona lua ma le tolu e faamoemoe i le palota a faipule i totonu o le Palemene.
O faiva ia o Fiti e lililo ona o lenei mataupu e ma’ale’ale mo le to’atele o tagata Niu Sila.
E momoli ai le faamālō ia i latou sa tusi ma fesoota’i i vaega faaupufai ta’itasi i Niu Sila faapea i sui faipule o le Palemene e tatalo iai e lagolago le pili.
O le palota o le pili a Tuino e lē o se conscious vote pe pule lava le sui faipule.
O le palota i le Palemene e fai i finagalo o vaega faaupufai ta’itasi.
O le autū ma le tōfa saili mālō lena o loo faasolo ai taligamālō i Aukilani a Samoa potopoto i vaega faaupufai a Niu Sila o loo taulamua ai le Pacific Leadership Forum, le Fono Faufautua a Samoa ma le Mafutaga Soofaatasi a Faifeau Samoa.
Ua mae’a feiloa’iga ma le Green Party, faapea Hon David Seymour ma le ACT Party aemaise o Hon Vaovasamanaia Winston Peters ma le New Zealand First Party.
O loo tālia se feiloa’iga ma le National Party, Labour Party ma le Te Pati Maori a o le’i oo i le tolaulauga lona lua.
O le upu e fai i le tamaloa Aana, ‘o Ape na moe manatunatu’.
