O le fesoasoani tupe e 5 tesimale 3 miliona tala Ausetalia ua faaagaga e le Malo o Ausetalia e faaleleia ai o tatou maketi i Salelologa i Savaii, faapea le maketi i Fugalei ma le maketi o I’a i Upolu, o lea ua amata ona faatino e pei ona mae’a asia le maketi i Salelologa e le tamaitai Komesina maualuga o Ausetalia o Emily Luck, le sui sooupu o le polokalame o tina a Malo Aufaatasi ma le Pule Sili o le Faalapotopotoga o eleele o Samoa i le faamoemoe e faatutū i lea maketi ni meapueata poo CCTV cameras, o faailoilo e iloa ai ni mu poo fire alarms, o apa e maua ai le eletise mai le la poo solar panels, ma isi meafaitino e pei o laulau ma nofoa e faaaogā e tagata faipisinisi laiti o loo faaaogāina le maketi i Salelologa.
O le fuafuaga o le fesoasoani lenei, ia saogalemu tagata o loo faaaogāina le maketi mo a latou pisinisi poo business vendors, e aofia ai le malupuipuia ai o tamaitai ma fanau teine laiti.
O le a faasolo mai lea asiasiga i le maketi i Fugalei ma le maketi o i’a a o lei amatalia galuega o le faapipiina o mea pueata ma faailoilo e iloa ai ni mu, aemaise o le saunia ai o laulau ma nofoa mo tagata e faaaogāina.
