O le fano o le ola o se tamaitai o se tagatanuu o Saina i le faalavelave tau taavale i se vaega o le alatele i Vailoa Faleata i le vaveao o le Aso Sa le aso 24 o Setema o le tausaga na te’a nei.

O le Aso Tofi ua mavae atu nei na lau ai le togisala a le Faamasinoga Maualuga i le avetaavale na aveina le taavale o le ituaiga o le Hyundai Getz na lavea ai lē ua maliu, a o ia sopoia le alatele i le vaega sa iai se laulau faataui’a.

O le mae’a ona su’esu’eina o molimau a leoleo na taunuu ai le faamasinoga i le faamaonia o le moliaga o le avetaavale faatamala na maliu ai se tagata faasaga i a Gafa Siona Tauafaō o Malie, ma ua nofosala i le falepuipui mo le umi e 3 tausaga ma le 9 masina.

Sa faamaonia foi isi ona moliaga sa ia ioe iai, o moliaga o le aveina o se taavale e lei laiseneina ma le lē tu e ofo le fesoasoani i lē na fano le soifua i le taimi o le faalavelave.

O le aiaiga a le faamasinoga ua faasā ai ona ave e Gafa se taavale e ala i le taofia o lona toe umia o se laisene avetaavale mo le umi e 5 tausaga.

E faato’ā mafai ona toe maua lona laisene avetaavale i le auai i se a’oa’oga e toe fuata’ina ma faatonu folau ai lona faatautaia o se taavale i se tulaga o le tausisia o tulafono o le saogalemu i luga o auala tetele.