O le toavalu o sui faatutu ua faamalieina uma aiaiga e avea ai ma sui tauva, e toatolu sui o le a tauva mai Siumu, e aofia ai le sui tutoatasi le susuga Faalogo Kapeli Faalogo Lafaele, o le tofa Tuuu Anasii Leota o le sui tauva mo le faatuatua ile Atua Samoa ua Tasi ma le tofa Tuuu Amaramo Sialaoa Pagamalie o le a tauva mo le vaega e puipuia aia tatau a tagata.

I le itumalo o Vaa o Fonoti, e toatolu foi sui faatutu o le susuga Feutaga’iimealelei Osovale Brown o le sui tauva mo le vaega faaupufai fou ua faaigoaina o le Constitution Democracy Republic Party poo le (CDRP).

Faaalia e le komesina o faigapalota na lesitala lea pati faaupufai ile aso Tofi na tea nei lea na amata ai ona faaulu atu sui tauva. O isi sui tauva o lea itumalo o le tofa Mauu Siaosi Puepuemai o le Faatuatua ile Atua Samoa ua Tasi ma le tofa Leausa Take Kitiona Naseri, mo le vaega e puipuia aia tatau a tagata.

Mo Faleata 4 e toalua sui faatutu o le tofa Ale Vena Ale o le sui faatu mo le vaega o le Faatuatua ile Atua Samoa ua Tasi ma le tofa Ulu Bismark Fuluasou Crawley o le sui tauva tutoatasi.