O taeao i le Aso Toonai, 6 o Iuni lea o le a faamae’a aloa’ia ai le vaiaso faapitoa lenei sa faatāuaina ai i Niu Sila nei le gagana Samoa, e pei ona amata mai se sauniga na tatala aloa’ia ai i le Aso Sa, 31 o Me ma faagasolo mai ai lenei vaiaso atoa.
E pei ona masani ai i tausaga ta’itasi, e pa’ū tonu le vaiaso e faatāua ai le gagana Samoa i Niu Sila, ma le vaiaso foi lea e faamanatu ai le Tuto’atasi a le malo o Samoa, ma e faia ai foi ni faafiafiaga a tagata Samoa i Niu Sila e latou te faamanatu faatasi ai lea aso tāua i le talafaasolopito o Samoa.
E tele polokalame faasamoa na faatino i a’oga amata, o a’oga o loo iai vasega e a’oa’oina ai le gagana Samoa o se tasi o matāupu a’oa’oina a le fanau, o kolisi ma iunivesite, faapea foi i nisi o falefaigaluega ma pisinisi aemaise lava i falefaigaluega o loo to’atele ai tagata Samoa e galulue ai.
O nisi o a’oga sa faatulaga se aso e tasi e pei o ananafi ma le asō ina ia oofu atu ai fanau i o latou lavalava Samoa, sa faatino ai siva a le fanau ma faatāua foi le aai i ni taumafa Samoa na fai ai a latou lunch.
O le ‘au’au poo le matua o le vaiaso o le gagana Samoa i lenei tausaga, “E afua mai i mauga tetele manuia o le nuu”.
Ma o lena ‘au’au sa faatāua i le tele o tautalaga, talanoaga ma faasoa sa faia i totonu o a’oga, i vaega eseese o le soifuaga e mafai ona faasino atu iai le uiga o lea fuaitau, e lē gata i le soifuaga faaletino, le si’osi’omaga ae sa faatatau atu foi i le soifua faaleagaga o le tagata.
