O fuafuaga a le malo i le toe tatala o malaga faavaomalo sa masani ai mai Samoa i atunuu e pei o Niu Sila, Ausetalia ma Amerika e pei ona tapena le aumai o vaalele tetele mo ia malaga, o se tasi o polokalame ua silasila iai le malo e iai le talitonuga o le a fetaui ma le toe iai o ni vaalele tetele, o le fuafuaga i le polokalame mo faai’uga o tausaga ta’itasi o le a faaigoa o le Kerisimasi i le Aiga poo le Christmas in the Family.
Ua faailoa e le Palemia i le toe usuia o le Palemene i lenei vaiaso o se polokalame o le a malaga mai ai aiga i fafo e tafafao ma asiasi i aiga i Samoa i le taimi o le Kerisimasi, ma o le a toe fausia ai sootaga vavalalata o aiga aemaise o mātua ma fanau.
O le faailoa e le ta’ita’i o le malo o lea fuafuaga na ia faailoa ai foi ma le suia o le Teuila i le polokalame o le a faaigoaina o le Vaiaso o Tu ma Aganuu Faasamoa.
