I le savalia ai nei o le 12 tausaga talu ona tuumalo le afioga i le Tamaaiga le afioga Matā’afa Lui Iosefo na faaee iai le suafa Matā’afa o le afio’aga o Amaile i le tausaga e 2011, o le Aso Faraile na te’a nei na filifilia ai e le Faamasinoga o Fanua ma Suafa i sana faai’uga le afioga Faumuina Opapo Soana’i Oeti, e nofo i le suafa tamaaiga o le Matā’afa ina ua mae’a ona su’esu’e e lea faamasinoga a le atunuu talosaga sa tuuina atu mai suli ma feoi e filifili ai se nofo.
O le faai’uga a le faamasinoga i le aotelega o ana su’esu’ega na faavae i le fulisia o se vaega to’atele o suli o Silupevaelei ma Faasuamaleaui e tofia le afioga i le Faumuina le Tupufia ina ua lē maua se autasiga o suli i se tasi e tausia le aiga.
E tusa ai ma faamaumauga o suli sa umia le suafa tamaaiga o le Matā’afa, o le tofia o le afioga Faumuina Opapo o le faato’ā toe iai lea o se nofo i le suafa tamaaiga o le Matā’afa i se tasi o suli o loo umia le suafa Sa’o o le Faumuina le Tupufia o le afio’aga o Lepea.
O le tuaa tamā o le ulua’i Palemia tama’ita’i o Samoa sa umia ia suafa tetele ma maualuga o le atunuu le afioga Matā’afa Fiame Faumuina Mulinuu II.
O le faai’uga ua taunuu iai le faamasinoga o su’esu’ega muamua a le Faamasinoga o Fanua ma Suafa sa faatonu folau i le faai’uga o le LC 852 o le tausaga e 1939 lea o loo aiaia ai, o le pule i le suafa Matā’afa o Amaile e iai lea i le Aiga Salevalasi.
O le isi faai’uga na faia i le tausaga e 1977 ua taoto sa faatonu folau ai foi le faamasinoga i lana iloiloga ma o se faai’uga ua taoto ai le ta’iala e tuu ese ai e le faamasinoga lea pule, ae tofia se nofo pe afai ua lē maua se autasiga o suli i sē e umia le suafa e tausia le aiga.
Ua faatonuina e le faamasinoga i lana faai’uga le faatino o le faanofotupu o le afioga Faumuina Opapo Soana’i Oeti e tusa o tu ma aganuu a Samoa, ma tuuina atu le pepa saofa’i mo le lesitalaina e tusa o mana’omiaga o le tulafono o fanua ma suafa.
