O le ta o le 9 i le taeao o le Aso Faraile lenei i Samoa ua tatala ai faitoto’a o le ofisa o le komisi o faigāpalota mo le faaulu atu o suafa o ni sui faatutū mo le faigāpalota laitiiti a le itumalo palota o Safata 2, lea ua faatulaga mai o le aso 10 o le masina fou o Iulai e faataunuu ai.
Ua faailoa e le ofisa o le komisi o faigāpalota o le faauluina o suafa o sui faatutū e tapunia lava i le Aso Faraile lenei le aso 19 o Iuni i le ta o le 4 i le afiafi, ae o le Aso Faraile o le vaiaso fou e tapunia ai le avanoa mo le toe faauiina i tua o le suafa o se sui tauva.
Ae o le faia ma le lē faia o se palota laitiiti a Safata 2 o le a iloa i le ta o le 4 o le afiafi o lenei Aso Faraile pe afai e na o le tasi lava le suafa o le a lesitala ma faamauina.
Ua avanoa le nofoa o lea itumalo i le faato’ā iva masina o le paea’iga 18 a le Palemene ina ua faamavae lē sa tauaveina le tofi le afioga Tuia Pu’a Fuatogi Letoa, e māfua i lona faasee tuagalu mai le vaega faaupufai e puipuia aiā tatau a tagata sa tauva ma manumalo ai i le palota tele ia Aokuso o le tausaga ua mavae, ae ua suia lana lagolago i le patī faaupufai o le Faatuatua i le Atua Samoa ua tasi.
O aiaiga o le tulafono o faigāpalota a suia le patī e lagolago iai se sui faipule, e faagafua le nofoa ae foi e toe filifili le itumalo.
