Ua aumai se lapata’iga a le Matāgaluega a Leoleo, Falepuipui ma le Toe Fuata’ina i tagata ua laisene faaletulafono a latou laau malosi poo fana, ina ia faaaogā tatau e tusa o le māfua’aga ua umia ai, ae lē o le faaaogā i se gaioiga e aafia ai le ola ma le soifua saogalemū o tagata.
O le lapata’iga lenei ua aumai ina ua faailoa ai e le matāgaluega le maliu o se tamā ua 37 tausaga o le soifua i se faalavelave na tupu i Siumu i le po o le Aso Tofi ua mavae.
Ua molia ai se taule’ale’a i le solitulafono o le fasioti tagata faamoemoeina ma ua taofia i le vaaiga a leoleo e faatali ai le aso e tula’i ai i le faamasinoga.
O le laau malosi ua masalomia na faaaogā i le faalavelave ua maua i sa’iliga a leoleo ma ua taofia foi e leoleo e avea ma mau ia latou su’esu’ega o loo faagasolo.
E lē o faailoaina e leoleo le māfua’aga o le faalavelave ona e le’i mae’a su’esu’ega.
