Na tula’i mai sa faalavelave i le afiafi o le Aso Lulu na te’a nei pe tusa o le 4pm i le afiafi, lea na osofa’ia ai e se tama’ita’i talavou se isi teine a’oga talavou i se fale faatalipasi i Glenfield Rd a o tūtū e faatali lana pasi i le tuua ai o le a’oga.
E matuā lē iloa e sia teine a’oga le māfua’aga ua osofa’ia ai o ia e le tama’ita’i talavou na faia le faalavelave, ma na ta’ua e le tinā o le teineitiiti na fasi, o lenei osofa’iga na faia i si ana tama, ua matuā fefe ai lava le teine e toe alu i le a’oga, ma ua tau lē tautala soo foi ona o loo gatete lava i le mea na tupu.
O le teine a’oga lenei o se Filipino, ma o le tolu tausaga talu ai na malaga mai ai ma lona aiga mai Filipaina, ma ua faamautū nei i Niu Sila
E a’oga i le Glenfield College, ma na ta’ua e se faia’oga mai lea kolisi, sa a’oga ai iinā le teine lea na osofa’ia Cloe, ae o le tausaga talu ai na tuli ese ai mai le a’oga ma e iloa uma foi i ona uiga faavevesi nei.
O loo faamoemoe mātua o si teine a’oga na faamanu’alia, ia vave ona maua e leoleo lenei tama’ita’i ma vave ai foi ona maua se fofō o lenei faafitauli, auā e lē o se taimi muamua lea ua tupu ai se mea faapea i lea lava fale faatalipasi, e faapea se lipoti, na fasi ai foi iinā i le fale faatalipasi lava lea i fafo mai o le McDonald i Glenfield, se isi foi teine a’oga Filipino i le 2023, ma o le tula’i mai o le faalavelave lea i le Aso Lulu, ua amata ai ona aga’i mai isi foi mātua e lipoti foi a latou fanau na osofa’ia ma fasi ai i lea lava vaipanoa a o isi na faia iai ni taufaamata’uga.
O se lapata’iga lea mo mātua ina ia nofo mataala ae o le latou foi talosaga, ina ia iai ni secuities i fafo ane o le kapaka a le fale’aiga mo le puipuiga o le saogalemu o nai fanau a’oga.
Puna o Faamatalaga: https://www.newstalkzb.co.nz/news/crime/north-shore-assault-teen-left-bloodied-and-traumatised-following-random-after-school-attack-at-glenfield-rd-bus-stop/
