Ua iai nei se faasilasilaga lapata’i mai le vaega o loo gafa ma faalavelave faafuase’i i Aukilani, le Auckland Emergency Management ina ia nofouta ma mataala le atunuu i le tulaga matuā loulouā o le a iai le tau i le asō.
O lenei lapata’iga o loo faasino tonu i nofoaga ia e ono aafia e pei o le Northland, Aukilani, Great Barrier Island, Waikto, o loo faatalitalia e ono amata mai le itula e 3pm i le aoauli nei e oo atu i le 8pm i le afiafi nanei.
E faatalitalia o le a pāpā faititili ma amata totō timuga mamafa, e amata mai le 10-25mm/h, o savili malolosi e 100km/h ma e ono oso foi se asiosio.
O le malolosi o nei timuga o le a faasolo e ono aafia ai foi nisi nofoaga i ni lōlōga faafuase’i aemaise lava i nofoaga maualalalo, o nofoaga o loo iai ni ālia ma vaitafe, o ni nofoaga tofē ma ono iai foi ni sologā eleele.
E lapata’ia le nofouta o i latou e feoa’i i taavale ona o le a matuā maseesee le auala ma o le a lē faigofie foi ona manino lelei le vaai i luga o le auala pe a oo ina puaoa ma mamafa timuga.
