O loo faaauau mai ai i le asō ona aafia Niu Sila i aafiaga o le tau, lea e lē gata o le malosi o le to’ulu o le aisa, timuga ae faapea savili malolosi.
O le fautuaga mai le NZ Transport Agency i avetaavale, o loo fautuaina le ave ma le faautauta e fua i le tulaga o iai luga o aualatetele.
I Aukilani o le asō lea o loo fautuaina e le ofisa o le vaaitau o le a feagai ai pea ma le malolosi o savili, ma o lea foi ua mata’itu le feoa’i o taavale o loo kolosia le auala laupapa a le Harbour Bridge ona savili malolosi.
Ae i le tau na iai ananafi i Canterbury, e tusa ma le 30 taavale lea na mamau i le Porters Pass, faapea fafo ane o le Arthur’s Pass i taavale agai atu i Kalaiesetete ona o le malosi o le aisa to’ulu.
O lea na lapata’ia vaega nei o le atunuu i le malosi o le aisa to’ulu, ma o loo faaauau mai i le taeao nei lapata’iga.
I lologa, ua lipotia mai foi o lea na lolovaia nisi o fale o aiga i Manawatu agai i Whanganui ananafi ma e oo mai i le taeao nei ua tapunia se vaega o le State Highway 53 ona o lologa.
Puna o Faamatalaga: Weather: Strong winds affecting Auckland Harbour Bridge, thunderstorms possible in upper North Island; snow dumping for South Island – NZ Herald
