Ua faailoa na pau lea o le poloketi na moomoo iai le afioaga o Patamea mai le Itumalo Palota o Gagaemauga 1, ia taumamafa i se suavai mamā.

O le saunoaga lea a le alii faipule o le itumalo le Afioga i le Sui Palemia ia Tuala Tevaga Iosefo Ponifasio ina ua tatala ai le vai taumafa o lea afioaga i le aso ananafi.

Na faailoa e Tuala o le afioaga lenei sa taumamafa mai le vaitafe e leai se faatanoa, leai se faamamā leai foi se tane vai e taofia ai se suavai faaleoleo, afai lava e maemaea le Maliolio e tafefea ai paipa ma tau faatalitali le taimi e mamā ai.

O le poloketi miliona tala ua tali mai nei i ia mafatiga ma na ta’ua o le faamoemoe lea o le Faigamalo ina ia afua mai lenei poloketi se manuia mo Samoa atoa.

O le faatinoga o lenei galuega sa faafetaia ai le galuega a inisinia o le Vision’s Enegineering i le galulue lē faalogologotiga.

Sa auai i lea faamoemoe nisi o Minisita o le Kapeneta aemaise le Tamaitai Minisita o Tina ma Tamaitai ia Mulipola Anarosa e molimauina le tulaga lelei o le faaaogāina o le poloketi tasi miliona tala a le itumalo o Gagaemauga 1.