E uigaese vaaiga i le gataifale o le taulaga o Apia mai le Aso Lua o lenei vaiaso ina ua pa’ulia ai se vaa fagota mai Asia, o se tasi o vaa fagota o loo afea le uafu tele i Apia mo le la’ueseina ai o a latou i’a o faiva i ogasami loloto ma ave i se fale ua i luga o le uafu, e tapena ai mo le aveina i fafo.
O le pa’ulia o lea vaa fagota ona o le maualuluga tele o galu, ma le malosi o āu o le sami.
Ua lē mafai ai e vaa ona taula i le uafu.
O le mafuaaga foi lea o le tapunia ai nei i se tulaga lē tumau o le nofoaga o le Friendship Park i le eleele fou, o se tasi lea o nofoaga ua vaaia le aafia o le vaega lata i le sami i galu maualuluga.
E faatitino le vaaia o ia tulaga i le sua o le tai.
O le puipuiga o le saogalemu o tagata e afea le Frinedship Park ua tapunia lē tumau ai mo le taimi nei.
I le vaa fagota o loo pa’ulia lata i le alalaupapa sima i Vaisigano, e lē o iloa se taimi e faia ai se galuega mo le aveesea.
