I le silia ai nei ma le lima tausaga talu ona filifilia le afioga Tuala Nikotemo Palamo ma Faamasino o le Faamasinoga o Fanua ma Suafa, o le vaiaso nei ua amata ai ona tiute i lea faamasinoga, o se tasi o Pelesetene lagolago, e pei ona sa faatauto ai i se sauniga i le Aso Faraile na te’a nei.
O le masina o Tesema o le tausaga e 2019 na faatauto ai le afioga Tuala Nikotemo Palamo faatasi ai ma isi tamalii e to’aono e avea ma faamasino o lea faamasinoga tāua a Samoa.
Na faatauto le afioga i le Pelesetene lagolago i luma o le Pelesetene ma le Sui Pelesetene, faapea Pelesetene lagolago ma faamasino o le Faamasinoga o Fanua ma Suafa, ma sa auai foi ona aiga ma uō.
