E lata i le 400 afe tala le tau o le a fausia ai se nofoaga totonu mo a’oa’oga poo se training center a le faalapotopotoga o le SUNGO poo le faamalu o faalapotopotoga tuma’oti i le atunuu, o le a faatupe i se fesoasoani a le malo o Iapani.
O lea ua mae’a sainia se maliega i le va o lea faalapotopotoga ma le ofisa o le malo o Iapani i Samoa e faamautū ai le faamatuuina mai o lea foa’i tupe.
O le SUNGO o lona ofisa tutotonu o loo i Vaitele-tai i le nofoaga o loo iai falefaigaluega ma nisi o pisinisi tuma’oti, ma o le a avea ma nofoaga e fausia ai lea fale e faia ai a’oa’oga mo sui o faalapotopotoga tuma’oti o loo avea ma sui o le SUNGO.
Faaalia e le ofisa o le malo o Iapani i lo tatou atunuu o a’oa’oga o le a faatino i le nofoaga pe a mae’a fausia, o le a fesoasoani lea i nuu ma afio’aga o loo faia polokalame mo le atina’e manuia o tagata i totonu o nuu.
E $367,755 tala Samoa le foa’i a Iapani mo lea galuega.
