Ua ta’utino le afioga i le Fofoga Fetalai o le Palemene le susuga Papalii Li’o Oloipola Taeu Masipa’u i lona tausisia o le tuto’atasi o lona tofiga e aunoa ma sona faaitu’au.
Ua faailoa foi e le Fofoga o le fono i se pepa o faamatalaga faalaua’itele, e lē faavaea se manatu ua ta’ua ai ua lē mafai ona ia faafoeina galuega a le fono aoao faitulafono ona ua leai sona tuto’atasi.
O le finagalo o Papalii e ala i lea pepa o faasalalauga faalaua’itele e tali ai i se finagalo o le ta’ita’i o le Itu Agai i se tusi i le faatonu na tuuina mai i le autusitala ma le aufaasalalau ma agiga ai i se lomiga a le nusipepa o le Sunday Samoa i le Aso Sa na te’a nei.
I lea tusi i le faatonu a le susuga Tuilaepa L Sailele Malielegaoi o loo ia faailoa ai, o se tasi o tulaga e ao ona silasila toto’a iai pe a faamuta le tulaga lē mautonu o iai nei le lotoifale o le vaega faaupufai o loo tu i le foe i le pulea o le malo, o le filifili lea o se Fofoga Fetalai e leo se tasi o avea ma faipule ae o se isi tagata mai fafo atu o le palemene.
O se tasi o mafuaaga ua faailoa e Tuilaepa i lana tusi i le faatonu ua mafua ai le va o le fogavaa i le faigamalo a le faatuatua i le Atua Samoa ua Tasi, ona ua le tuto’atasi le Fofoga Fetalai i le faatinoga o ona tiute i le faafoeina o le fono faitulafono a le atunuu.
O le tasi itu ona o le Fofoga Fetalai le isi faipule sa saini i le tusi ua faatea ai le palemia ma isi minisita e to’alima mai le latou pati faaupufai, aemaise sa malaga foi i le sailigatupe a lea pati faaupufai sa masii ai i Niusila, Ausetalia ma Amerika.
Peitai ua faailoa e le Fofoga Fetalai o lona auai i lea malaga ona o le pati faaupufai lea na tauva ai i le palota tele ma o loo avea ai o ia ma sui lesitala.
O le faatinoga o ona tiute o loo mulimulita’ia ai le tulafono faavae ma tulafono tumau a le Palemene.
Na faaalia e le Fofoga Fetalai o le mautū o upufai o Samoa e faamoemoe i le faatuatuaina o lona ofisa e auauna i tagata lautele.
Ua ia ta’utino ai o le faatinoga o lana matafaioi o loo faia i le tulaga maualuga i le tuto’atasi ma le lē faaitu’au.
