O le Aso Lulu o le vaiaso nei na auai atu ai le afioga i le Palemia o Samoa i le faalauiloaina o le polokalame o le lakapi liki a le Pasefika o loo taulamua ai le malo o Ausetalia lea e faaigoaina o le Pacific Rugby League Partnership.
Sa faatasi ai le ta’ita’i o le malo ma le palemia o Ausetalia, o le palemia o Papua Niu Kini ma le palemia o le malo o Tonga. E 250 miliona tālā Ausetalia o le a faatupe ai lea faigapaaga mo le atinaa’e o le lakapi liki i le pasefika ma o se vaegatupe o le a faasoasoa i totonu o le 10 tausaga.
Ua faaalia e le palemia o Ausetalia i auala o fesootaiga a lea malo, o lea faigapaaga o le a vaāvā lalata ai sootaga o atunuu i taaloga, ae faaleleia ai le itu i a’oa’oga, ma maua ai avanoa i galuega. Faaalia foi e le taitai o lea malo o se faigapaaga foi o le a fausia ai nisi taleni maoa’e i le lumanai.
O le aai o Brisbane i Ausetalia sa faalauiloa ai le faigapa’aga ma sa taualuga i le maimoaina e palemia o Ausetalia, Samoa, Papua Niukini ma Tonga o le taaloga lakapi liki o le State of Origin sa taalo ai Niu Sa Uelese ma Kuiniselani.
E ese mai i le faalauiloaina o lea faigapaaga i le taaloga lakapi liki, ua lipotia e le vaega o le Associated Press o le avanoa lea o le palemia o Ausetalia na faatino ai ni talanoaga faavaomalo ma ta’ita’i o le malo o Samoa, Tonga ma Papua Niu Kini i nisi o mataupu tau i le va o malo i le Pasefika, aemaise o le mataupu i le puipuiga.
Sa faatūtū nisi o ia talanoaga i le saoloto o atunuu o le Pasefika mai malosi o meatau faaniukilia, ma le faataitaiga a le malo o Saina i le Aso Gafua o le vaiaso nei, lea na fana ai se meatau niukilia mai se vaamaulu o lea malo tele ma faapalasi i se vaega o ogasami o atuniuu o le pasefika i saute.
Ua faailoa se finagalo o le palemia o Ausetalia ua ia ta’ua ai o le a aumai faalauaitele se finagalo o taitai o malo o le Pasefika e tetee malosi ai i le gaioiga a le malo o Saina i le faata’ita’i o sana meatau niukilia i totonu o ogasami o le Pasefika.
