Ua aumai se fautuaga malosi mai le Matagaluega o Leoleo, Falepuipui ma le Toe Fuataina i lo tatou atunuu o se solitulafono mamafa ma matuiā le faauma o le ola o se pepe faatoa fanau ma e mamafa foi le faasalaga pe a faamaonia.
Ua aumai lea fautuaga ona o se pepe na maua i se vaitafe ua uma le ola ae o loo afīfī i se taga pepa iila. E lē o faailoaina e leoleo le nuu na maua ai ae ua faailoa o le itu i saute i sasa’e o Upolu ma o le vaitafe na maua iai le pepe e i tua ane o le fale o le tagata na viliina leoleo ma faailoa iai lea tulaga.
O saute i sasae o Upolu o loo iai nisi o nuu o le atu Aleipata. E lima tausaga le faasalaga i le falepuipui o se tasi e faamaonia lona lafoa’i o le oloa tāua. Ua faailoa foi e leoleo se isi o faalavelave o loo su’esu’eina o se faalavelave tau taavale na tupu i le aso 27 o Iuni ma e toatolu ua maliliu ai e aofia ai le ave taavale na fano lona soifua i le tuanai o se taimi na lavea ai le taavale.
O Ti’avea na tupu ai lea faalavelave ma o le fautuaga a leoleo i ave taavale ina ia tausisia pea le saogalemu ma usita’ia le saoasaoa faatulagaina.
