Ua taunuu le finagalo o alii ma faipule o le afioaga o Moataa ise latou fono i le vaiaso nei, e tapuni le pisinisi o le Taumeasina Hideaway, ae faasalatupe ni taulele’a se toalua o loo tuuaia i le gaioiga ua maliu ai se tamā 53 tausaga le matua sa tafao i le Taumeasina Hideaway i le po o le aso Toonai ua mavae.
O le lipoti a le vaega faasalalau o le MerMada Pacific poo le Mai News o loo faailoa ai se finagalo o se matai o le nuu, a o le sui faipule o Vaimauga 2, le tōfā Lenata’i Victor Tamapua, e faasino i le faaiuga ua fai.
Ua faaalia e Lenata’i i le lipoti sa lagolagoina e alii ma faipule le talosaga o le laisene mo le avamalosi e faatau e le pisinisi, peita’i ona o le faalavelave na tulai mai ua lē gata ua tapu ona toe tatala, ae ua faasala tupe ai i le ta’i 20 afe tālā mai ia i la’ua o loo tuuaia.
Ua faia ai foi le faaiuga e pei ona faailoa e lea matai, e faate’a ma le nuu lē e ana le pisinisi.
Na asia le nofoaga i le afiafi o le Aso Lulu ma molimauina ai o loo loka le faitotoa e ulufale ai i totonu.
