O le faaiuga o le vaiaso nei o le a mae’a ai le tautua a se tasi o tinā o le atunuu ua tele tausaga o galue i le galuega faatusitala ma siitia ai lona tulaga ile avea ma faauluuluga o le faletelevise o le TV1 ma le leitio o le Mai FM i Mulinuu. O le afioga Galumalemana Faiesea Lei Sam Matafeo sa avea ma tusitala ma tapenaina polokalame i le leitio o le 2AP i taimi o iai le Matagaluega o faasalalauga ae sa nao le tasi foi le ualesi faasalalau i ia taimi.
I le faatuina o le faletelevise a le Malo i le tausaga e 1993 na galue ai i le vaega foi o tala i vaifanua ma polokalame seia oo ina avea ma Ofisa Sili e faauluulu iai lea auaunaga faasalalau a le malo. Peitai o le tausaga e 2008 na aveesea ai lea auaunaga faasalalau ma le malo, ma faatutoatasi ma faaauau ai ona avea pea o ia ma Pule Sili seia oo mai i le masina nei, o le a ia tuua ai lea tautua.
O se tasi o tamaitai ma tinā ua tele foi tausaga o galue i le faletelevise ma le kamupani o le Samoa Broadcasting Corporation Limited o ia lea o Taulogomai Ropati Roebeck, o le a see atu e tauave le tulaga o le pule Sili o lea auaunaga faasalalau i Samoa.
O le uluai televise lea i Samoa, ae o le taimi nei ua ono isi faletelevise ua iai i le atunuu e aofia ai ma televise o loo faagaioia e nisi o Ekalesia.
