Ua ave le faamalo a le Fofoga Fetalai susuga Papalii Li’o Taeu Masepau i le galuega a leoleo i le vaiaso na tea nei lea na alu ai se osofaiga i le fale o se tasi o tagata faigaluega maualuga a le Mālō lea o loo lipotia e nisi o Ofisa faasalalau o le Sui Komesina o Faigapalota ia Afualo Daryl Mapu ma maua ai ni fualaau faasaina o le aisa ma nisi o masini komepiuta.
I se faatalatalanoaga a Papalii ma le Niusipepa o le Samoa Observer na ia viia ai le galuega a leoleo aemaise o le Minisita ma taitai o lea Matagaluega i se mataupu o loo aafia ai lona atalii.
E le’i teena e Papalii i ripoti e faapea o Afualoo lona atalii lea ua taofia e leoleo peitai na ia faapea e lē suia ai le tulafono ua soli ma o tagata faapea e tatau ona molia ma soo se tasi lava e lē usitaia le tulafono.
Taua e Papalii o le tele o mea e fai i le pogisa e toe aliali uma lava ma atonu o le mafuaaga lea e lē iai se lelei i faiga faaiuga a lea fale faigaluega ona o loo galulue ai ma tagata o loo solitulafono. Na fai le sailiga o le 10 pasene mo nofoa o tamaitai i le Palemene ma faataitaiga e Papalii o faaiuga lē talafeagai a lea Ofisa.
Taua foi e Papalii “ E manaomia e le Mālō tagata faigaluega faamaoni ma tautua mo le atunuu ae le’o tagata e tagofia le aisa ma soli tulafono. Oute fautuaina foi le Matagaluega o Leoleo ina ia faaauau pea a latou osofaiga ma saili pe iai nisi o tagata faigaluega o le Mālō o loo faia lea gaioiga solitulafono.
Ua ave ai foi le fautuaga i tagata maualuluga poo aufaigaluega a le Mālō ina ia taumamao ese mai le faia o ia gaioiga ae galulue faatasi mo se lumanai o Samoa.
