O le vaiaso nei o loo faagasolo ai se aoaoga mo Malu o le Malo e siitia ai le tulaga o le puipuia mai faatinoga o le auaunaga.
E pei ona faasalalauina e le Matagaluega o Leoleo, o lenei aoaoga o loo mafai ona auai ai ni Malu o le Malo mai Toga ma o le faamamafa i sui auai ina ia faaaogāina ma le tatau lenei avanoa ua maua e fesoasoani lea i le faalauteleina o le malamalama aemaise o le tulaga i le tomai ma agavaa i la latou auaunaga.
O lenei aoaoga o loo faafoeina lea e sui mai le Matagaluega o Leoleo mai Ausetalia ma o le faafetai lea a le Matagaluega o Leoleo i Samoa nei ona o le lagolago o loo faaauauina pea e le Malo o Ausetalia auā Malu o le Malo i Samoa nei.
O lenei faigapaaga o loo atagia ai le galulue faatasi o Matagaluega e lua ina ia faamalosia pea le tulaga o le saogalemu i le Pasefika e ala i le galuega faa-Malu o le Malo.
O vaega o loo ave ai le faamamafa i lenei aoaoga ia siitia le auaunaga e puipuia i latou o loo sulu atu mo se fesoasoani ma o se tasi lenei o auala e faaaupegaina ai i tomai ma agavaa i lenei auaunaga ina ia maualuga ai pea la latou auaunaga o loo faatino i le atunuu.
E lua vaiaso o loo faatautaia ai lenei aoaoga ma le faamoemoega ia telē sona aogā i le Matagaluega ma ona matafaioi e ala i le saogalemu lautele o le atunuu.
