Ua taofia nei e sui o le ofisa o Tiute, le silia ma le 52 kilokalama o le pauta faasāina o le methamphetamine ma le cocaine i le malaevaalele faavaomalo i Aukilani nei.
I lipoti mai le Newstalkzb na ta’ua ai, o le ulua’i mataupu na faamauina i le maua ai pe tusa ma le 50 kilokalama le mamafa o pauta faasāina o le methamphetamine na i totonu o ni ‘ato, e foliga na aumai i le malaga na sau mai San Francisco.
O le lona lua o mataupu na faamauina ai e 2 kilokalama na maua o aumai faananā i se atopa’u a se alii 24 tausaga le matua, na taunuu mai i Aukilani i Niu Sila i se faigamalaga mai Chile.
Ua taofia ma molia nei lea alii i lona umia ma lona aumaia i totonu o le atunuu o ni pauta faasāina o se nakoti o loo faatulaga i lalo o le Class A controlled drug, o lona uiga o se tasi lea o pauta faasāina o loo faamauina le maualuga o aafiaga.
E oo atu i le 19.7 miliona le tau aofa’i o nakoti na taofia e le Ofisa o Tiute, ma i le maualuga ai o nei pauta faasāina, ua ta’ua le ono oo i le $54 miliona le tau faaataata o aafiaga e feagai ma le atunuu ona o nei nakoti.
Puna o Faamatalaga: https://www.newstalkzb.co.nz/news/crime/auckland-airport-drug-bust-52kg-meth-and-cocaine-seized/
