Ua mae’a fausia nei se tasi o galuega tāua auā le taligamalo a Samoa i le fono a Malo o le Taupulega, o le maota lea e taunuu ma faaee ai malo faaaloalogia poo le VIP lounge i le malaevaalele faavaomalo i Faleolo.
O se galuega na amata ia Novema o le tausaga na te’a nei ae ua mae’a i le masina o Aokuso ma faaulufale ai i le Aso Faraile ua mavae le galuega e 11 tesimale 2 miliona tala lona tau atoa.
O se galuega tele na faatupe i seleni maua a le pulega o malaevaalele ae o le konekarate faufale o le Zheng Construction na latou fausia le maota, ua faatotoga i ona vaega uma e tautua ai malo faaaloalogia e malaga ese ma ulufale mai i Samoa i lo tatou malaevaalele faavaomalo i Faleolo.
