Ua toe tapena le taliu o le uto i Sea ma faafeagaiga ma o latou faletua ma usugafono a le Ekalesia Metotisi i Samoa ma atunuu i fafo mai Sinoti e 17, ina ua tapunia i le afiafi o le Aso Sa ua mavae atu nei le Koneferenisi tele o lenei tausaga 2024.
O le tausaga nei na faamanatu ai ma le onosefulu tausaga talu ona amata usuia Koneferenisi a le ekalesia.
O le lauina o le Tusi Tofiga e faailoa ai fesuia’iga o le aufaigaluega faifeau ma nisi ua mālōlō gasegase ma mālōlō manumalo mai le galuega faifeau na taualuga iai le Koneferenisi a lea ekalesia, ma o se Tusi Tofiga foi ua faailoa ai nisi o fesuia’iga i le au mautofi i galuega i totonu o le pulega o le ekalesia, aemaise foi o ona ta’ita’i.
O lea ua toe faaauau nisi o tofiga e pei o le Pelesetene Aoao o loo tauaveina e le susuga Faulalo Leti Paaga, ma ua savalia nei le lima tausaga o tusiaao pea iai le ekalesia e avea ma Pelesetene Aoao.
O le Koneferenisi o le tausaga e 2018 na uluai filifilia ai o ia i le tofiga.
