Ua faasala i le tai selau aumatua taulelea e toatolu o le nuu o Salelavalu o loo manaomia e leoleo mo suesuega i le toga maruana na maua i se fanua o lea afioaga, ae ua le avea e matai i leoleo e tusa o le latou lagolago i suesuega a Malu o le Malo, i le tuanai o le osofaiga i le Aso Toonai na tea nei, na faamanualia ai ni alii leoleo se toalua i se pulufana o se laau malosi o le ituaiga o le 12.

Ua faailoa e le Komesina o leoleo le susuga Auapaau Logoitino Filipo, o le a ia savalia le afioaga mo se feiloaiga ma alii ma faipule e faamalamalama atili ai le mataupu, ma le mafuaaga o le manaomia o alii e toatolu o loo masalomia i le iai o o latou aafiaga i le faia o le solitulafono o le umia ma le totoina o laau faasaina o le maruana, faapea se isi o taulealea o loo tuuaia i lona umia o se laau malosi na ia faapa ma lavevea ai leoleo e toalua. 

Faaalia e le Komesina e toafitu tagata o le nuu o loo manaomia mo suesuega e aofia ai le toatolu sa faasalalau suafa ma ata, peitai o le mae’a o le fono a le nuu i le Aso Gafua na momoli ai na o se taulealea talavou 20 tausaga le matua i leoleo.

Ua faaalia e le komesina e itiiti sona sootaga i le faia o le solitulafono, ae ua le avea le toatolu o loo manaomia ma isi tagata e toafa o loo masalomia.

O le lē avea lea i leoleo o i latou ia, na faasala ai loa e matai i le tai selau aumatua. Faaalia e Auapaau Logoitino Filipo, o se faanoanoaga lea ia te ia o le Komesina o le matagaluega o leoleo, ona sa folafola e matai i leoleo le tuuina atu o le latou lagolago i suesuega ma momoli atu taulelea e toatolu e aofia ai ma lē sa ia umia ma faapa le laau malosi, ae ua le tausisia e matai a latou faigaupu.

O le toe agai atu o leoleo i le Aso Gafua e faatino a latou tuugatala ma matai, ae na tau’ai ai i maa ma taavale a leoleo.