E le’i mamao atu ni masina sa ave ai le vaa la’upasese o le Lady Samoa III e faaleleia ona afi ma isi vaega ona ua iai faaletonu, ma sa umi nai masina e lē o toe fealua’i ai lea sa, e tele taavale ma pasese e malaga ai.
O faaletonu ua aafia ai lea vaa o le faalapotopotoga o vaa a Samoa, ua silasila ai nei le Malo e sa’ili se isi vaa la’upasese fou e ave ai ma taavale ma uta, ina ia sui a’i lea vaa ua silia i le 20 tausaga o lana tautua.
O le mafua’aga lea o le tuua o le atunuu e le Minisita o galuega tetele ma fela’ua’iga e aofia ai ma le faalapotopotoga o vaa a Samoa le tofa Olo Afoa Fiti Vaai, i le faamoemoe e sa’ili se isi vaa fou.
O loo malaga ai faauluuluga o le pulega o uafu ma faauluuluga o le kamupani vaa a Samoa ma le faalapotopotoga o vaa a le atunuu.
Ua faaalia e le Minisita le tofa Olo i upega tafa’ilagi o auala o faasalalauga a le Malo, o galuega na toe faaleleia ai le Lady Samoa III mo ni masina na iloa ai, ua vaivai le fola o lea vaa i le vaega e ave ai taavale ma uta mamafa, ma ua tatau ai loa ona faia se isi sa’iliga mo se isi sa e faatautaia malaga e lē gata o pasese e ave ai ae o uta mamafa e pei o taavale.
O Brisbane ma Adelaide i Ausetalia o loo aga’i iai le minisita ma lana ‘aumalaga i le faamoemoe e silasila i nisi o vaa o iai pe talafeagai, ae o le tau o se tasi o ia vaa e pei ona faailoa e le minisita i ia auala o faasalalauga a le malo, e tusa ma le 7 miliona tala Amerika.
