O le taimi pisi o malaga a taavale i le afiafi ua mānava galuega o le Aso Lulu o le vaiaso nei ae alu atu le taavale na faafoe e se taulealea e 24 tausaga le matua ua so’a le alii leoleo sa tiute ai i le faatonutonuina o taavale.
Na tupu le faalavelave i le vaega o le alatele i Lepea o loo iai molī faasinoala poo traffic lights.
O se ata video sa pu’eina sa maua ai le ata o le taimi na tupu ai le faalavelave lea na salalau i le api o foliga ma silasila iai le to’atele ma latou molimauina ai le faalavelave na tupu.
O tagata sa iai i le taimi o le faalavelave na fesoasoani e ave le malu o le malo i le falema’i, ae ave e leoleo le avetaavale mo su’esu’ega.
Ua faailoa e le Sui Komesina o leoleo le afioga Leiataua Samuelu Afamasaga i se lipoti a le Samoa Global, ua molia lea taulealea i le tago i le foeuli ae leai se laisene avetaavale.
Ua molia foi i le ave taavale faatamala ua oo ai manu’a i le alii leoleo.
O taimi pisi o le feoa’i o taavale i le taeao i le usu i galuega ma fanau i a’oga faapea le tuua ma le mānava o galuega i le afiafi e mata’alia ai leoleo i le vaega o taavaleafi i le faia o le latou tiute o le faatonutonu o taavale ia vave ona gaogao le auala ma vave taunuu tagata i galuega ma a’oga aemaise o le foi i aiga.
Ua faaalia e le malu o le malo na aafia i se lipoti, e ao i avetaavale ona faatāua lo latou saogalemu i taimi uma e faia ai le latou galuega i luga o auala tetele.
Ua faasolosolo manuia le susuga i le malu o le malo a o taofia ai i le maota gasegase i Motootua.
