E 22 miliona tālā ua faaalu e le malo e ala i le auaunaga a le kamupani vaalele o le Samoa Airways e faaleleia ai afi ma tino o vaalele laiti Twin Otter e lua, ma ua saga faaleleia ai malaga a ia vaalele laiti o loo tautuaina malaga i le va o Samoa ma Amerika Samoa.
O le Aso Faraile ua mavae na faalauiloa ai e le kamupanī vaalele le toe taunuu i fanua o le isi ona vaalele Twin Otter ina ua mae’a galuega sa faia iai e le kamupani o le Unity Aviation i le atunuu o Kanata, o le kamupani foi lea na faia ai galuega faaleleia o le isi vaalele o le ituaiga lava lea ua toe lele mo le tautuaina mo femalagaa’iga i le ea.
O le afioga i le Sui Palemia sa saunoa i le sauniga sa faia i le nofoaga e faamautū iai vaalele i le malae vaalele faavaomalo i Faleolo, lea sa auai ta’ita’i o le malo ma malo valaaulia aemaise o sui o le pulega o le kamupani vaalele a Samoa.
Sa auai foi ma sui o le kamupani i Kanata sa faia ai galuega faaleleia o le vaalele.
