Ua tapena le toe foi atu i aulotu, o nuu ma aiga faapea atunuu o usugafono mai sinoti eseese a le Ekalesia Metotisi ina ua tapunia i le afiafi o le Aso Sa ua mavae atu nei, le koneferenisi tele o lenei tausaga ina ua mae’a ona lau le tusi tofiga.
Ua faailoa ai i le tōlaulauina o le tusi tofiga nisi o faife’au o le a siitia e galulue i nisi o matāgaluega poo aulotu i totonu o Samoa, o Amerika Samoa, Niu Sila, Ausetalia, Hawaii ma Amerika.
Ua momoli ai le faafetai a le Pelesetene o le ekalesia aoao i usugafono ma ē uma sa auai i le koneferenisi faaletausaga o le 2026.
O le Aso Sa lona lua o le masina fou o Aokuso e tatau ona siitia uma ai faife’au i matāgaluega ua tofia e galulue ai.
