E manatu le vaega faaupufai a le Leipa ua tatau ia Niu Sila ona lagolago ia Aferika i Saute i le faamasinoga faavaomalo le International Court of Justice lea e aofia ai ma tuuaiga faasaga ia Isaraelu ma le tele o tagata ua maliliu i Gaza.
Fai mai le RNZ o se pepa na tuuina ane i le asō mai le sooupu a le ofisa o le va i fafo a le Leipa o David Parker ua unaia ai le malo ua tatau ona lagolago i le mataupu lea.
O le masina na tea nei e toatele atunuu e aofia ai ma Niu Sila na o latou palota i le palota a Malo Aufaatasi ina ia taofia loa taua i Gaza e ui e lei iai se faamoemoe o Isaraelu e faatino lea tulaga.
O le finau a le Leipa e faapea o le malo o Niu Sila i lalo o le latou faigamalo talu ai sa o latou faalavelave ai i le mataupu i le va o Lusia ma Ukraine i le faamasinoga lava lea ma e tatau foi la ona faia e Niu Sila i le mataupu lea i Gaza.
O loo faatalia se tali a le faigamalo i lea finagalo faaalia o le Leipa.
