Ua toe soalaupule e le auaunaga a le Toomaga mo ē Puapuagatia i le amataga o ana galuega o lenei tausaga fou, ana polokalame faatino e faalauiloa ai pea ana taumafaiga e tetee atu i sauāga aemaise ana fuafuaga o loo fesoasoani ai i aiga limavaivai e ala i le tasi o ana polokalame o le Nofotane.
O le aoaotetele o ia polokalame ma le sulufa’i iai o fanau, tina ma tamaitai ua aafia i soo se sauāga, o loo faalagolago i le aao mafola ma le lima foa’i o tagata ta’ito’atasi, faapea pisinisi tuma’oti ma faalapotopotoga i Samoa ma atunuu i fafo aemaise o ekaleasia eseese i lo tatou atunuu.
Ua faailoa i le amatalia o le tautua a lea faalapotopotoga tuma’oti i lenei tausaga fou le afea i se foa’i tupe e lima afe tala mai le pisinisi lauiloa o le Sula Bakery and Supermarket i Moataa.
O se foa’i ua talia ma le loto fiafia ma le faafetai e le Pelesetene o le Toomaga le faletua o Siliniu Lina Chang.
O le nofoaga o loo tausia ma nonofo ai fanau ua sauāina le Campus of Hope o le a faaaogā iai lea foa’i tupe.
