I le tele o tausaga sa tautua ai se tasi o tamalii o le atunuu i le Malo e ala Matagaluega o A’oga, Taaloga ma Aganuu, e pei ona sa avea ai ma se tasi ofisa sili lagolago, o lea ua toe ulufale le tofa Luatua Seumanutafa Semiperive Epati e faaauau lana tautua o se tagata faigaluega a le Malo, ina ua filifilia ai e le Kapeneta e avea ma Ofisa Sili muamua o le pulega o le matagaluega fou o taaloga ma alaga’oa mo le fiafia o tagata.

Ua faailoa e le ofisa o le sooupu o le Malo le faia o lea filifiliga ma faamautū i le fono a le Kapeneta o le vaiaso nei.

E tofia Luatua Semiperive e avea ma Ofisa Sili o lea matagaluega a le Malo, o loo avea ma faufautua i le ofisa o le Minisita o Galuega Tetele ma Fela’ua’iga a le Malo.