E foliga ua togi i fafo tulou le tusi tulafono ina ua tula’i mai le faalavelve o loo gugulu ai nei Sini i le fasiotia o ni tamaitai se to’alua i le faaitu o Panania i Sini i le po o le Aso Toonai na te’a nei.
Fai mai lipoti o tamaitai o Lametta Fadlallah 49 tausaga ma Ammer Amy Al Hazouri 39 tausaga na tafana lava i totonu o se taavale a o le’i tāina le iva i le po lea.
Fai mai e to’afā tagata sa i totonu o le taavale lea ma pe ā ma le kilomita na minoi atu iai le taavale mai le vaega na tafanaina ai tamaitai ia ae paka ai loa ma faalogoina e tuaoi le feei ane o tagata mai le taavale ma vili ai loa leoleo.
Ua ta’ua o le 49 tausaga e to’alua si ana fanau ma na maliu ai lava i lea nofoaga ae o le 39 tausaga na aveina atu i le falema’i i Liverpool ma maliu ai lava mulimuli ane. O le isi to’alua na iai i totonu o le taavale o se teine talavou 16 tausaga ma le alii talavou 20 tausaga e le’i manunu’a.
E talitonu leoleo o se vaega foi lenei o vesiga a kegi e pei ona molimauina pea i le tele o vaega o Sini i isi foi faalavelave muamua peitai ua ese le tulaga ua alia’e mai e foliga ua lē toe folo i tulafono masani a ia foi itua’iga kegi e lē pā’ia ai lava tamaitai ma fanau peitai o le faalavelave lea ua manino o se osofa’iga na fuafua lelei.
O loo faaauau pea su’esu’ega a leoleo ma o loo iai foi popolega e i’u ina fāifāi tetele nei vesiga ma toe iai foi nisi soifua faaopoopo e ma’umau ai.
