Ua faamaonia mai e le Mālō o Samoa o le a faia se suesuega faasaga i ni faamaumauga ma liki mai tua o loo faaalia ai le fesoasoani o se alii sue tusi e faia se tulafono faailoa ai Samoa o se atunuu mo teugatupe faavaomalo e aunoa ma le totogi o ni lafoga.
O lenei mataupu na afua ona suesue ina ua mapuna mai fafo pepa o faamaumauga o teugatupe a nisi o le au mau tofi a mālō o le lalolagi aemaise o nisi o le au mau’oa, milionea ma pilionea le avea o Samoa ma se tasi o atunuu na teu ma faafailele ai tupe a nisi o gaioiga faaalatua sa teu mai iai tupe ina ua alofia ai le totogiina o lafoga.
O pepa o faamaumauga o teugatupe faavaomalo ua faaigoaina o le Pandora Papers e silia ma le 12 miliona o loo iai ia faamaumauga . O le liki mai ai i fafo nei faamaumauga ma maua ai e le vaega o tusitala suesue ona sui auai e silia i le to’a 600 o loo salalau solo i atunuu o le lalolagi ua o latou faasalalau faalauaitele nei faamaumauga.
Ua aofia ai i nei pepa se pisinisi tau teugatupe faavaomalo poo se offshore banking a se alii tausi tusi mai Ausetalia ia Graeme Briggs e faapea na tofia e avea ma sui vaaia o le Mālō o Samoa poo se honorary counsul mo le atunuu o Singapore i le umi e 25 tausaga.
O Briggs sa feiloai ma se tagata faitulafono i Samoa ma amata ai ona tapena se tulafono mo teugatupe faavaomalo ae o le fausia o ia tulafono e pei ona faaalia i ia faamaumauga na viia ai ma lea alii Ausetalia ma taua o ia o le tamā o tamā o Pisinisi tau teugatupe faavaomalo poo le grandfather of offshore industry.
O le sootaga o lea alii Ausetalia ma Samoa na mafua ai ona filifilia e avea ma sui vaaia o le atunuu i totonu o Singapore mo le tele o tausaga seia oo mai i le tausaga 2016. O loo faaalia i ia pepa o faamaumauga na ia faalauiloa Samoa i le lalolagi o se atunuu e malu ona tulafono mo pisinisi tau teugatupe faavaomalo. O ana faiga faapisinisi foi nei na faamanuiaina ai i ni faamanuiaga i se tino i tupe tele e tusa ma le $62 miliona tala na ia maua mai ai.
O loo faaalia foi i nei faamaumauga e pei ona lipotia ai e le vaega faasalalau a Peretania le BBC faapea le niusipepa o le Guardian e iai se tasi o faipisinisi sa avea ma Faatonu o se faletupe i Samoa sa malu ana teugatupe i Samoa ma alofia ai le totogiina o lafoga.
E leo faaalia i ia pepa o faamaumauga pe na aafia ai ni faiga solitulafono i le faia o ia teugatupe peitai o loo atagia ai ni faiga sa tanuma’i ai totonu ni auala ma gaioiga e taumafai e nātia le iloa o ia teugatupe tetele ina ia lē agavaa ai e totogi atu lafoga.
O lenei mataupu na tautino ai le taitai o le Mālō Fiame Naomi Mataafa o le a tagatagai ai le faigamalo poo le a se iuga e maua mai i nei faamaumauga ua faaalia.
