E toafitu le vasega o alii ma tamaitai pisikoa Amerika ua sauni e tautua le Matagaluega o Aoga i le avea ma faiaoga e aoaoina le tusitusi ma gagana tautala i le faaperetania poo le Igilisi i aoga i Samoa ua tofia e galulue ai.
O le Aso Faraile ua mavae na faatauto ai i latou ina ua mae’a le 11 vaiaso sa feagai ai ma aoaoga faamasani i le olaga faasamoa, faapea le aganuu ma le tautala i le gagana Samoa.
O le vasega muamua lea o pisikoa Amerika ua toe galulue i lo tatou atunuu, i le tuanai o le 3 tausaga o taofia le toe malaga mai o ni pisikoa e mafua ina ua toe faafoi uma i le Iunaite Setete i le taimi o le vevela o le pipisi o le faama’i Koviti-19.
