O le aliali ai o suafa o nisi o tagata faigaluega a le malo ua faailoa ua sauni e tauva i le palota tele o sosoo ai nei a le atunuu, ua faailoa ai e lē sa avea ma Palemia ma o le ta’ita’i o le Itu Agai, o le faia o le amiotonu e tatau ai ona faamavae se tagata faigaluega a le malo pe afai ua momoli i se pati faaupufai.

O palota tetele a le atunuu ma palota laiti ua tuana’i sa sa’ilia ai sui usufono o itumalo i le Palemene sa tauva ai ma nisi sa galulue i le malo.

O le tasi lea o faitioga sa lagona i ia vaitau ua tuana’, o le tauva o nisi o tagata faigaluega sinia a le malo, ae sa maua le avanoa e toe maua ai lana galuega pe a lē manuia i le palota.

O faitioga na masaa mai ai i lea vaitau na faia ai ma faiga faavae, e tatau ona faamavae se tagata faigaluega a le malo e fia tauva i faiga filifiliga mo tofi faipule o le Palemene, ma a lē manuia e lē mafai ona toe foi i lana galuega.

Peita’i se’ia vaganā ua toe tusi talosaga i le avanoa o le galuega sa seei ai, poo se isi avanoa faigaluega i le malo.

O loo aiaia i le vaega 12 o le tulafono o faigāpalota o le tausaga e 2019 e mafai ona faamavae se tagata faigaluega a le malo e fia avea ma sui tauva, i le aso e lesitala ai lona suafa o se sui faatū, mo se faigapalota a le atunuu e sa’ilia ai sui faipule o le Fono Aoao Faitulafono a Samoa.