O le Aso Lulu o le vaiaso nei a o lumanai toe sauniga ma falelauasi le Tupu o tagata Maori i Niu Sila, na faaoo atu ai i le Kovana Sili o le malo o Niu Sila, faamaisega mai le afioga i le Ao o le Malo, afioga Tuimalealiifano Vaaleto’a Sualauvi II.
O loo faailoa ai e le Ao o le Malo le avea o ia ma sui o le Malo ma tagata uma o Samoa e faaoo atu ai faamaisega mai le loto faanoanoa ma le faavauvau ona o le tuua o le malo e le afioga i le Tupu o Kingi Tuheitia.
Faaalia foi e le Ao o le Malo i lana faamaisega, o le 18 tausaga o le nofoaiga a le tupu ua tuumalo, o se faailoga o le autasiga o tagata Maori uma o Niu Sila faapea le Pasefika a o seei mai e avea ma ta’ita’i o ona tagata.
