O faiga sa sau a’i i galuega tau faletupe sa masani ona tumutumu iai tagata faigaluega ma le aufaipisinisi e talosaga ni aitalafu poo nonogatupe, o se faiga o le a lē toe faatinoina e le auaunaga a le faletupe o le Samoa Commercial Bank poo le SCB.
Ua mafua lea suiga fou e pei ona faailoa e le pulega o lea faletupe i le atunuu ona o se auala sili lea ona lelei mo tagata e fia faia ni nonogatupe laiti poo small loans auā o le a lē toe tau faatumu ai se talosaga e pei ona sa sau a’i i le malaga atu lea i le faletupe.
O lona uiga e lesitala le suafa i fesootaiga televavave a le faletupe ma avanoa ai ona maua faamatalaga i le faatinoina o se talosaga.
E tele le taimi o le a faaaogā ai mo isi tiute tāua nai lo le umi o faatalitali i le faletupe pe talia pe teena se nonogatupe aemaise lava o aitalafu e fia toe maua se faaopoopoga.
O faiga faatekonolosi foi ia ua faaaogā nei e le faalapotopotoga o faaputugatupe o le lumanai manuia le NPF e talosaga ai nonogatupe a le aufaisaofaga lea ua lē toe tumutumu ai lea auaunaga tuma’oti a le Malo e pei ona sa vaaia i tausaga ua tuanai le feoma’i ma le tautulei i le uumi o laina a le aufaisaofaga e fia maua ni nonogatupe.
E iai le talitonuga o se faiga fou lenei o le a faasolo ina faaaogā e isi tautua tau faletupe i le atunuu.
O se faiga faatekonolosi ua faaaogā foi mo isi auaunaga e pei o talosaga mo visa malaga i Niu Sila ma Ausetalia.
