Ua toe valaau foi le Leipa mo le faamālōlō o le minisita lagolago o le Soifua Mālōlōina, Casey Costello ina ua alia’e faamaumauga sa faalagolago iai lana faai’uga e faatatau i le faaitiitia o lafoga mo le tapaa.

I le lipoti lata mai o le mataupu lea i le RNZ ua ta’ua ai sa fautuaina e le Treasury Costello e na o le kamupani gaosi tapaa le Phillip Morris e manuia tele i lafoga ia o le a faaitiitia i le 50 pasene, peitai sa faailoa e Costello e iai lava ana fautuaga tuto’atasi o loo fua aga’i iai lana faai’uga, pe ana musu e faalauiloa ia fautuaga pe faatalanoa ai foi peitai o le Aso Lulu o le vaiaso nei na ia faailoa ai i le RNZ e lē o toe mamao ona faailoa lea o ia fautuaga.

O anapo la na folasia ai ia fautuaga ma ua ta’ua i le leitio faavaomalo a Niu Sila e lē o iai se lagolago malosi i faamaumauga e lima sa ia tuuina ane ma e lē o ni fautuaga foi mai ni sui o le soifua mālōlōina.

Fai mai le sooupu a le Leipa, Ayeesha Verrall ua iloa ai i i e lē tatau ona faatuatuaina Costello ma ua tatau ona faamālōlō.

E lei avanoa ane le minisita lagolago, Costello mo sona finagalo i le mataupu ina ua afea e le aufaasalalau.

Puna o Faamatalaga: https://www.rnz.co.nz/news/political/529803/labour-calls-for-associate-health-minister-casey-costello-to-be-sacked-over-advice-to-cabinet