Ua aumai se fautuaga a leoleo i lo tatou atunuu ma faailoa ai o ‘au’upega e pei o laaumalosi e lē o ni meataalo ma e lē tatau ai ona faaaogā e faatama’ia ai meatotino tāua ma aogā, pe faaaogā i se gaioiga e maua ai se ata e faasalalau i upega tafa’ilagi, pe faaaogā i se gaioiga e lamatia ai le saogalemū o isi tagata.
O lea fautuaga o loo aumai i se faasalalauga a le Matāgaluega o Leoleo, Falepuipui ma le Toe Fuata’ina ua faailoa ai le faafetai i le atunuu i sa’iliga ua pu’eina ai ma molia le taulealea ua masalomia sa ia umia se laaumalosi na ia fana ai i le po se molī auala poo se street light.
Sa pu’eina lea gaioiga i se telefoni ma salalau ai le ata video i le api o foliga ma fautuaina ai leoleo e faia se galuega e sa’ilia ai le tagata na ia faia.
Ua molia ai nei le alii o Sape Olomotu ua 41 tausaga le matua ma o loo nofo taofia i le vaaiga a leoleo.
