Ua faatalia nei e se alii e galue ave taavale laitiiti la’upasese poo se ave taxi, se faasalaga a le Faamasinoga Maualuga ina ua faamaonia moliaga sa ia teena, ma o ni moliaga e faasino i solitulafono o le faia o se fesoota’iga taufaiaiga ma se teineitiiti e i lalo o le 16 tausaga le matua, ma le solitulafono o le faia o se faaoolima matagā.
O le teineitiiti na aafia e 15 tausaga le matua ma ua faaalia i le faai’uga tusitusia, na ave faamalosi e lē ua molia ma faia iai ia solitulafono i Mulinuu ma Siusega ia Me o le tausaga e 2024.
O le vaiaso nei na lau ai le faai’uga ina ua mae’a ona su’esu’e molimau.
O lē na aafia sa nofo i se tasi o lona aiga i se afio’aga tulalata i Apia i le taimi na ave faamalosi ai.
Ae i sa’ili’iliga a le faamasinoga na māua ai e masani lelei lē ua molia ma le teineitiiti, ae o le nofoaga faatali pasi i tua o le maketi i Savalalo na feiloa’i ai le teineitiiti ma le ave taxi o Faataualofa Sauileone Taefu.
O se uo teine a lē na aafia e nofo i Niu Sila na maua ai le fesoota’iga i le facebook na mafai ona maua ai le nofoaga na ave iai e lē ua molia.
O se tasi lenei o matāupu tau faamasinoga sa tagofia ma su’esu’eina e le afioga i le faamasino sinia o le Faamasinoga Maualuga le afioga Vui Clarence Nelson ua mālōlō litaea i le vaiaso nei.
