Ua valo’ia ai nei le to’atele o tagata tafafao o isi atunuu o le a afea Samoa i mālōlōga ma tafaoga ina ua taunuu manuia i le vaiaso nei le ulua’i malaga faataupou a le vaalele 737-800 a le Qantas a Ausetalia mai Aukilani i Apia.
E to’a 145 le pasese na malaga mai ai, ma o tu masani o malaga muamua faataupou sa faatino ai e le vaega o le saogalemū o le malae vaalele faavaomalo i Faleolo le fanaina o le tino o le vaalele i le vai a o aga’i ane i le nofoaga e tutū ai vaalele.
Faaalia e le pulega o malae vaalele i lana upega tafa’ilagi, e to’a ivasefululima le pasese na malaga ai i Niu Sila i le vaveao o le Aso Lulu ina ua toe foi le malaga muamua a le Qantas mai Aukilani.
O faafiafiaga na saunia e le pulega o tagata tafafao na faafeiloa’i ai le malaga muamua a lea kamupanī vaalele mai Niu Sila.
O Aso Lua, Aso Tofi ma Aso Toona’i ua faatulaga mo ia malaga a le Qantas e tuua ai Aukilani ma malaga sa’o mai i Samoa.
