O le taofia ai i le atunuu o Vietnam o alii talavou o Joseph Va’a 27 tausaga le matua ma Steve Tofa 23 tausaga le matua ona o su’esu’ega a leoleo o lea atunuu i le gaioiga solitulafono o loo tuua’ia ai i le faaoo o le maliu ia Lorenzo Lemalu o se tagatānuu o Ausetalia, ua faailoa e le malo o Samoa o loo faia feutana’iga faavaomalo ma sui o lea malo.
O ia feutana’iga e pei ona faailoa i se pepa o faamatalaga mai le ofisa sooupu o le malo o Samoa o loo faatino a o faia ai pea su’esu’ega a leoleo i Samoa ma leoleo o le atunuu o Vietnam.
Ua feagai ai le Matāgaluega o le Va i Fafo ma Fefaataua’iga a Samoa ma fesoota’iga ma ana paaga faavaomalo i se taumafaiga e faamautinoa ai le tulaga o le saogalemū ma le sologa lelei o tulaga uma o le iai o ia tagatānuu o Samoa i lea atunuu.
O le naunau ai o le atunuu e fia maua faamatalaga o loo faatino ai ia feutana’iga, o se itu o loo amana’ia e le malo o Samoa peita’i talu ai le faaauau pea o ia feutana’iga faavaomalo o le a lē mafai ai i lenei taimi ona toe iai se isi faamatalaga faaopoopo e tuuina mai faalaua’itele.
Ua aumai ai le tuualalo a le malo i le atunuu lautele ma le vaega o galulue i soo se auaunaga tau faasalalauga ina ia faaaloalogia le tulaga faavaomalo o loo tagofia ai le matāupu i le taimi nei, ma ia taofia le faia o ni faasalalauga ma ni faamatalaga e ono sātia ai le tulaga solo lelei o su’esu’ega o loo faagasolo.
