O le aso muamua o Iulai o le a amata ai le tamaitai Polofesa, le afioga ia Tafaoimalo Tologata Professor Leilani Tuala-Warren i lana tofiga fou, o se faauluuluga i le tomai faaloia i le Iunivesite o Waikato (Dean of Te Piringa Faculty of Law)
O se tamaitai polofesa, ae o se tamaitai faamasino foi ua leva ona tautua mo Samoa i le tele o tausaga.
I se pepa o faamatalaga mai le Pacific at Waikato na faasilasila aloaia ai lea matati’a fou ua ausia e lenei alo o Samoa.
I talaaga o le afioga ia Tafaoimalo, o sē na amata lona auai i totonu o Waikato talu mai tausaga 1990, ina ua mae’a ana a’oa’oga i le Iunivesite ma faauu ai i ana pepa tikeri i le tomai faaloia (undergraduate and Master of Laws degrees) a o lei amata ona galue i Samoa.
A o iai i Samoa sa galue le tamaitai polofesa o se loia mo le ofisa o le Loia Sili mai le tausaga 1998 agai i le tausaga 2000.
Sa toe foi lana afioga i le Iunivesite o Waikato ma avea ai o se faiaoga mo le 5 o tausaga, a o lei tuua mo Samoa e amata lona lava ofisa o loia.
O le tausaga 2009 na avea ai Tafaoimalo ma Ofisa Sili o le Komisi o le Toefuataiga o Tulafono o Samoa le Samoa Law Reform Commission.
O le afioga i le tamaitai polofesa e lona lua iai tamaitai i le atunuu na filifilia e avea ma faamasino o le faamasinoga faaitumalo.
I le avea ai o ia ma faamasino, na ia amatalia galuega faatino i le faatuina o le Faamasinoga mo Aiga (Family Court) ma le Faamasinoga mo Sauaga i Totonu o Aiga (Family Violence Court), o se uluai faamasinoga i lea ituaiga ua faatū i totonu o le Pasefika e lē aofia ai Niu Sila.
O le tausaga 2016 na avea ai o ia ma faamasino o le Faamasinoga Maualuga (Supreme Court) ma o le tausaga 2022 na amanaia ai e le Iunvesite o Waikato le tamaitai polofesa i se faailoga taualoa ua ta’ua o le University of Waikato Distinguished Alumni Award.
Ma i le toe foi mai ai o le tamaitai i le Iunivesite i le tausaga 2023, o lea na avea ai o ia ma uluai tamaitai Pasefika Polofesa i le tomai faaloia, ma i lona maua ai o le tofiga o le faauluuluga o le matātā i tomai faaloia i le Iunivesite.
O lea foi matati’a ua faailo ai, o ia o le uluai tagata Pasefika i Niu Sila ua umia lea tulaga, ma o loo iai se tusi mai le faamasinoga poo le temporary judicial warrant e ia te ai le malosiaga lē tumau e avea o se faamasino o le Faamasinoga Maualuga o Samoa.
